اولو تانرينين آديله

اينسانين اوشاقليق چاغلاريندان اولان خاطيره لر اؤمور حافظه سينه بير بزك دير. همشه او دئوراني خاطيرلاييب، حتي اؤزو اؤزومه اوشاق كيمي گولومسه ممي ده خاطيرلاييرام.

اوشاقين ان بؤيوك آرزي سي بؤيويوب، سؤز صاحيبي اولماق، اؤز ايراده سيله ياشاماق دير. اونون اوچون ده، اوجا و يوكسك ويقارلي هر شئيه حسرتله باخار، تامارزي قالار.

اوشاقليغيمين ان گؤزل آن لاري بلكه ده ان آنلاملي دقيقه لري دوغا دا گزدييم، اؤيرندييم زامان لار اولوب دور. آخ كي نه گؤزل بير آنلاردي. دوغانين او گؤزل هاواسيندا اويان بويانا قاچماق، چمن لرين اوستوندا ياتيب ديويرلانماق. چاي قيراغيندا اوتوروب آياقلاريمي سويا ساللاييب، هردن ده بير سودا شاپباشوپ سالماق...

آما هئچ بير شئي داغين اؤنونده دوروب اونون ان يوكسك نقطاسينا باخماق قدر ذوق ورمزدي. همشه اونون كيمي اوجا، يوكسك اولماق حسرتين چكرديم. سئلين، طوفانين اؤنون آلان داغلار. هئچ بئلي بوكولمه ين داغلار باشي اؤنونه اَييلمه ين، اوزو گونشه ساري اولان داغلار. يوكسك لره باش قالديران داغلار.

چوخ عجيب گلردي منه، سئل- سو قاباغيندا هر نه ترپشردي آما داغلار هپ دومدوز دوراردي. هئچ اَييلمده ن، هئچ تيتره مدن، سينمادان، ييخيلمادان.

دئمك اوشاقليقدان، بؤيوك چاغلاريما يازيلان بو سناريو، اؤمور بويو يازيل سادا بو چاغدا گؤزومون اؤنونده سريلن سينما پرده سينده تاماشايا قويولاجاقميش. دئمك اوشاقليغيمدا جانسيز باش اوجا، ويقارلي داغلار، بو چاغيمدا جانلاناجاقميش.

هئچ اينانا بيلميرم كي، بير اؤمور حسرتله باخديغيم داغلاردان دا، اوجا و محكم داغلار واريميش. تانري يارانيشينين شاه اثري اينساندان دوغولموش داغلار. داغلار كيمي سسيز يوخ، بلكه ان يوكسك سسله هارايلانان داغلار. ظولمون تؤرتدييي بو قارانليق قيشدا، زورلا ييخيليب، دؤيولسه لرده، ورولسالاردا، تحقير ائديلسلرده، بَي- بَييم ليك لري شماتته قويولسادا، يئنه ده قالخيب ديمديك دوران داغلار.

داها اوشاقليغيمدا حسرت له باخديغيم داغلارا تامارزي دييلم. قاييديب بيرده اوشاق اولماق ايسترديم. گئديب داغلارين اؤنونده دوروب باغيرماق ايسترديم: «باخين بير، نه يوكسك اوجا باشلي داغلاري وار ائليمين». داها اونلار ان اوجا وارليقلار دئييل كي. دوستاقلارين ميله لري، گوجون بيزيم داغلاريميزدان آلير. بلكه ده بير ياريش دير بو. موقاويمت ياريشي. اولا بيلر كي بو قفسلر منيم اولوسومون باشي يوكسك، جانلاريندان باشقالارينين دوزگون ياشاماقي اوچون پاي وئرميش اينسانلاريميزي، اؤزونده سيغديرمايا چابالاسين آما اينان اودا داها آنلاميش كي بو ياريشي اودوزوبدور. بلكه ده فخر ائدير و بونو بير شانس بيلير اولوسومون وارليق سيمگسي اولان بو اوجا داغلاري اؤز ايچينده سيغديرماغي.

داها داغين اؤنونده دوراندا تبسمله باخيرام. هن، نه ذوق آليرام، منيم اطرافيما حلقه وورموش، منيم كؤكومدن بسلنميش داغلاردان. مندن اولان منيم اوچون يانان، وارليغيم اوچون چابالايان وارليقلاريم. يوخ هئچ آغلامارام كي، يوخ هئچ سيزلامارام كي، طائب دئميشكن: «آسلان، قفس آرخاسيندان باخار».

اي بو داغلاردان قوپموش، دره لره دوشموش داشلار، بيلميرم بلكه ده ائله دره ده بير اؤمور ياشادين. آما سنجه منيم اينانجلا، ذوقله و صبرله بسله دييم، فخر ائتدييم داغلار سيزين آلچاق طاقلي دوستاقلاريزا سيغارمي؟

سيغماز ! سيغماز ! سيغماز

سنجه دوستاق دوواري منجه اولوسومون توپراقي، يوردو يوواسينين بير پارچاسي اولان بو قفس لرده منيم اولوسومون شاه اثرلري سيغارمي؟ يوخ سيغماز.

اونلار وطنيمين بَزييدير. اونلار اولوسومون آرزي بايراقي دير. اونلار گله جييمين بينؤره سيدير. سن نه جسارتله اونلارا تَرس باخما جرعتي تاپميسان. بونو بيل داغ نه قدر ويقارلي و سَرت بيچيمده رفتار ائتسه ده، ايللر بويو هئچ نفرين ناله ائتمه ده ن، انتقام آلمادان آلچاق ليقلاردا دوروب اونو زنجيره چكنلره داشماسادا، بير گون داشاجاق داغين داشديغي آن چوخ آغير اولار. نيه كي اؤزو ياراتديغي آتشفشان دا، آلچاق ليقلاردا دورانلارا هئچ بير سيغيناجاق قالماز.